Алматы қаласы Төтенше жағдайлар департаментінің, Қызыл Жарты Айдың, Республикалық ғылыми-практикалық психикалық денсаулық орталығының және Алматы қаласындағы дағдарыс орталықтарының қызметкерлері «Шекарасыз дәрігерлер» (MSF) халықаралық медициналық-гуманитарлық ұйымы ұйымдастырған төтенше жағдайлар кезіндегі психоәлеуметтік қолдау көрсету бойынша бес күндік тренингке қатысты.
Тренингтің мақсаты — төтенше жағдайлар кезінде зардап шеккен адамдарға алғашқы психологиялық көмек пен психоәлеуметтік қолдау көрсету бойынша қатысушылардың практикалық дағдыларын нығайту, сондай-ақ алған білімдері мен тәжірибесін әріптестеріне одан әрі үйретуге дайындау (ToT — Training of Trainers).
Оқу барысында қатысушылар психоәлеуметтік қолдаудың практикалық әдістерін, дағдарыс жағдайларындағы тиімді коммуникацияны, стрессті басқаруды, өзін-өзі қолдау және эмоционалдық күйзелістің алдын алу тәсілдерін меңгерді.
Сонымен қатар қатысушылардың алдағы уақытта әріптестерін тиімді оқытуына мүмкіндік беретін тренингтер өткізу бойынша практикалық дағдыларды дамытуға ерекше назар аударылды.
